Debattid

Sjølv når det er politikk og debatt – ikkje berre økonomi og databehandling – som heng over oss som ein mørk dott, må vi tenke positivt: Hausten, og særleg valkamptida, skjenker oss ikkje berre raudvin i staden for kvitvin, men ei rekke nye, lekre omgrep. Nyorda under er henta frå avisene Dag og Tid og Stunder, Natt og Dag og Tid og Stad:

Hjorteplagedebattant

Terroristutleverings-

avtalegrunnlag

Vaffelhjartepolitikar

Byplanleggingsdebattsvin

Debutantdebattnettroll

Flotte ord vi enno ikkje har sett, derimot, verken i verdsveven eller avisene, er:

Statsfinansspekulasjons-

akrobatikk

Donormorskjærleiks-

kompleks

Skyformasjonsfantasi-

foster

Vernepleierobotprototype

Kjønnskifteorgan

Kyrkjelydspredikant-

dotterdotter

Denne herren, som heiter Richard, går hausten i møte utan sko. Her er han på konsert på ein av dei 7893 festivalane norske festivalarrangørar arrangerte i sommar. Richard er britisk, og snakkar fint lite norsk, men han gjorde eit forsøk til ære for oss, og laga eit flott nyord vil alle kan ta med oss inn i mørketida: pissregnkonsekvens.

Ny vitsversjon

Du veit den gamle vitsen: «’Vil du ha eit eple’, spurde fruktskåla juicekartongen. ’Nei, eg er eplenektar’, svarte kartongen.» Den nye versjonen går slik: «’Vil du ha ein iPhone?’ spurde Lefdal ein kunde. ’Nei, eg er Apple-nektar’, svarte kunden.»

Hugs det, når du bannar over elektroniske dingsar og klagesaker og fascinerande kølappsystem: Det finst ikkje dårlege vitsar, berre dårlege dagar.