Litteratur

Håvard Rem

havard@dagogtid.no

Tildelinga vart kunngjort torsdag 5. oktober av Svenska Akademien i Stockholm i Sverige. Nobelprisen er rekna som verdas gjævaste litteraturpris,og inneber mellom anna ein sum på kring ti millionar svenske kroner.

Fosse er den fjerde norske forfattaren som vinn prisen, og han er den fyrste nynorskforfattaren. Det er nær hundre år sidan sist ein norsk forfattar vart tildelt prisen, Sigrid Undset i 1928. I 1920 gjekk han til Knut Hamsun og i 1901 til Bjørnstjerne Bjørnson.

Prisen vinn ein ikkje for ei enkelt utgjeving, men for heile forfattarskapen. Fosse er fødd i 1959, han bokdebuterte i 1983 med romanen Raudt, svart, og har gjeve ut kring førti bøker. Prisen får han, heiter det frå Stockholm, «för hans nyskapande dramatik och prosa som ger röst åt det osägbara».

– Eg er overvelda, og svært glad og takksam. Eg vel å sjå denne pristildelinga som ei tildeling til den litteraturen som fyrst og sist vil vera litteratur, utan å ta andre omsyn. Og ikkje minst vel eg å sjå pristildelinga som ein pris til nynorsken og til den nynorske målreisinga. Anten eg vil eller ei, må eg i sannings namn takka nynorsken for prisen, seier Fosse i ei pressemelding frå Samlaget.