Pipa kjem tilbake til moderlandet

René Magrittes (1898–1967) berømte bilde «La trahison des image», som er betre kjent som «Ceci n’est pas une pipe», blir no flytta heim til moderlandet etter 45 år i Los Angeles County Museum of Arts. Det ikoniske bildet vart måla mellom 1928 og 1929 av den belgiske Magritte, som då var 30 år. Måleriet viser ei pipe med teksten: «Dette er ikkje ei pipe.» Slik skapar kunstnaren, som er kjend for den surrealistiske stilen sin, medvit rundt kva objekt som er verkelege, og ikkje berre festa til papiret. Kunstverket var starten på ei rekkje kunstverk som stilte filosofiske spørsmål – til dømes om eit flagg er eit flagg når det er laga av gamalt avispapir. Bildet skal no stillast ut i Royal Museums of Fine Arts of Belgium.

Mobilen som tidsmaskin

Gjennom mobilapplikasjonar utvikla ved Universitetet i Oslo kan vi no observere D-dagen, keisartida i Roma eller klimaendringane i framtida. Gunnar Liestøl, professor ved Institutt for medier og kommunikasjon ved Universitetet i Oslo, leier eit forskingsprosjekt kalla «Situerte simuleringar» med mål om å nytte teknologi til historieforteljing og formidling. Når du er inne i appen på ein bestemt stad, kan du sjå den tredimensjonale animasjonsfilmen for akkurat denne staden.

Vertikale byar kan vere framtida

Urbane høgblokkar har lenge vorte kritiserte for å skape einsemd og isolasjon. Byplanleggarar i Singapore har derfor eit ambisiøst prosjekt: Å ta i bruk element frå landsbyen når dei bygg – oppover. Slik vil dei ta vare på kjensla av landsbyen – ein såkalla kampong – i byen, med nær tilgang til familie og grøntområde, skriv BBC. Dei vertikale byane skal ifølge prosjektet ha både himmelterrassar, hage på taket, grøntområde på bakkeplan og ikkje minst fellesstover. I tillegg inngår det i ideen at eldreheimar og barnehagar blir plasserte i same bygg, slik at fleire generasjonar kan bu nært kvarandre. Så langt er sju «vertikale byar» planlagde i Singapore, for å teste om dette er framtidas byplanlegging.

Elise Løvereide