Å leva er meir enn nok

Dei har sitt å stri med, personane i den sterke debutboka til Simen Holm. Boka er ei samling noveller, oftast med realistisk føresetnad, men eit par stader med innslag av slikt som fordrar det Samuel Taylor Coleridge i si tid kalla willing suspension of disbelief.

I den første teksten møter me Thor, som har gjort ein sabotasjeaksjon. Han er ein oppegåande kar som veit at han er under observasjon, og som ikkje lèt seg lura av psykologar og andre som vil finna ut av tankane hans ved kameratsleg haldning.

Eit levande menneske

I «Motstrøms» er hovudpersonen ei kvinne som minner denne lesaren om ein av figurane til Robert Stoltenberg, den pappvindrikkande åleinemora til Herman Flesvig. Men Gudrun Rigvold, som ho heiter hjå Holm, er ikkje ein karikatur, ho lever i utkanten av det gode livet ho nok gjerne vil ha, men det har gått litt i stå med livet hennar, ho hatar eksmannen sin, truleg ikkje utan grunn, ho postar ivrig på Facebook og får billege oppmuntringar der, og framtida ser ikkje roseraud ut når arbeidsavklaringspengane tek slutt, men likevel lyt ho unne seg litt ekstra no og då. Detaljane er truverdige, og sinnelaget til Gudrun er attkjennande, ho er eit levande menneske som kunne trenga litt flaks.

Den neste teksten ser ut til å gå føre seg i purgatoriet, eller eit venterom til skirselden, der ein kar, Alek, får skanna livet sitt og sjå kvar det gjekk skeis. Han kjem til ei fatalistisk erkjenning av at det han har gjort, er resultat av den han er, og sjølv om mykje skulle ha vore annleis, vart det berre slik det vart.

I «Ingenting som brenner» heiter hovudpersonen Bernhard. Han har no og då samvær med sonen Theo, som ikkje ser på faren som eit idol akkurat. Theo er politisk korrekt og allvitande om klima, og handlingane til Bernhard er, slik Theo ser det, uetiske eller dumme. Ute er det brennvarmt, men dei har seg ein tur i ein skihall, der dei gjer nokre nye oppdagingar av kvarandre.

Er du abonnent? Logg på for å lese vidare

Digital tilgang – heilt utan binding

Prøv ein månad for kr 49.
Deretter kr 199 per månad. Stopp når du vil.

E-postadressa di

Eg godtek vilkåra

Eller kjøp eit anna abonnement

Er du abonnent? Logg på for å lese vidare