Filmfjes

Amanda-nominasjonane er offentleggjorde, og eit av fjesa som går igjen, er kong Haakons. Det vil seia, Kongens nei er hyppig representert med nominasjonar for beste film, beste regissør (Erik Poppe), beste mannlege skodespelar (Jesper Christensen) og beste filmmanus (Harald Rosenløw Eeg og Jan Trygve Røyneland), for å nemna nokre. Heile tolv nominasjonar og dermed rekord, men når Børning 2 konkurrerer om årets beste film, dristar eg meg til å seia at det er ikkje eit toppår for norsk film.

B.A.

Sjå på nett no

(Netflix) Regissør Nick Broomfield har ikkje berre musikkrelaterte kjendisar på lista si. Heile to dokumentarfilmar laga han om den dømde massemordaren Aileen Carol Wuornos som vart avretta i 2002. Aileen Wuornos: The Selling of a Serial Killer (1993) og Aileen: Life and Death of a Serial Killer (2003) nærer fascinasjonen vår for det morbide utan å verka for spekulativ.

B.A.

Tre på topp

Dag og Tids filmmeldarar er på fellesferie i Georgia. Difor: krigsfilmar derfrå sidan siste skot i 2008:

1) Mandariner. Zaza Urushadze 2013. Skildringa av estarar i skvis under krigen i Abkhasia fekk ein fortent Oscar-nominasjon som beste framandspråklege film med framifrå humanisme.

2) House of Others. Rusudan Glurjidze 2016. Ein stilig, dyster og dristig debut om å ta over huset til dei som tapte borgarkrigen, fekk prisen for beste spelefilm på BIFF i Bergen i fjor.

3) Corn Island. George Ovashvili 2014. Det er gildt at ein vakker liten film om ei jente og bestefaren som driv jordbruk på ein flekk i elva medan soldatar driv forbi, kom på kino i Noreg.

H.T.