Filmfjes

Fjeset til Mari Bakke Riise har eit stort smil denne veka. Filmen hennar, Kayayo, hamna på lista over ti kandidatar til Oscar for beste korte dokumentarfilm. Riise har hatt hell i California før. Ho vann publikumsprisen hjå Palm Springs International Short Fest i år. Kayayo følgjer Bamunu, som blir send frå nord i Ghana til Accra då ho var seks år. Der ber ho varer frå marknaden for hovudstadens rike for å skaffe pengar til familien. Du kan sjå filmen på nett hjå Aftenposten.

H.T.

Sjå på nett no

(Netflix) Som ein av dei som sit med trynet i ein skjerm store deler av tida, kan eg ikkje anna enn å dragast mot ein serie som Dark Net. Det mørke nettet i seg sjølv verkar alt anna enn forlokkande etter nokre episodar. Men serien tek også opp mindre lugubre sider ved verdsveven – alt frå glasauge med kamera i til appar som erstatning for ekte kjærastar. Me lever i ei verd av parallelle univers, kan ein få kjensla av. Uansett kva univers ein oppheld seg i, er det interessant å sjå kva som skjer hjå naboen.

B.A.

Tre på topp

Scener der bjørnar briljerer:

1) Jungelboken, regi: Wolfgang Reitherman (1967). Scena der bjørnen Baloo syng «Bare Necessities» til Mowgli, er ei gullgruve av god stemning. Det blir knapt jul utan denne Disney-klassikaren.

2) Grizzly Man, regi: Werner Herzog (2005). Ei binne forlèt eit blodig matfat for å snusa på den eksentriske bjørnevenen Timothy Treadwell. Då blir det vel spennande.

3) The Revenant, regi: Alejandro González Iñárritu (2015). Ein høgst realistisk dataanimert grizzlybjørn går laus på Leonardo DiCaprio i ei slåande actionscene i dette grandiose eposet.

H.T.