Filmfjes

Fjeset til tidlegare turistsjef i Oslo, Alfhild Hovdan, burde ifølge Nasjonalbiblioteket vore meir verdsett. Bladet Rushprint skriv at ein under prosjektet Nordic Women in Film fann prov på at Hovdan hadde regi på dokumentarfilmane Hallo Oslo! I og II pluss Norske kulturpersonligheter. Desse var blant dei første norske lydfilmane tidleg i trettiåra. Då var ho første kvinne i landet til å lage film, med god margin til Edith Carlmar, som debuterte med Døden er et kjærtegn i 1949.

H.T.

Sjå på nett no

(8 kjelder på Filmgrail.com) Loving (2016) var i hovudprogrammet i Cannes, og Ruth Negga var nominert til Oscar for beste hovudrolle, men filmen kom ikkje på kino i Noreg. Jeff Nichols står for regi på eit lågmælt og intenst drama om eit par som endra lover om «raseblanding» i USA i 1967. Sanne historier om episke rettssaker kan fort bli kvalmande, men ikkje her. Actionhelten Joel Edgerton er herleg som handverkar av få ord. Negga er nydeleg i ei rolle som utviklar seg sakte og strålar sterkt mot slutten.

H.T.

Tre på topp:

Svenskane kan jo verkeleg laga god komedie av det lette slaget, det står ikkje på det!

Tilsammans (2000) Ein av dei komediane som klarar å kombinera det såre med det fabelaktig morosame på ein glimrande måte.

Kopps (2003) Reinspikka tøysehumor, men med nok sleivspark og gode rollefigurar til å verta topp underhaldning.

Adam & Eva (1997) Morosamt om opp- og nedturar i eit ekteskap – og tilfeldigvis laga av Måns Herngren, ein av Solsidan-regissørane.

B.A.