Filmfjes

Kjetil Alexander Gudmestad er eit av mange norske filmfjes som vankar i Grimstad i helga, når Kortfilmfestivalen fyller 40 år. Vi gratulerer. Som vanleg er det eit vell av stutte filmar å ta av. Sjølv er eg spent på Gudmestads Carl Lange, basert på Kjell Askildsens suverene novelle. Den lovande siddisen har base i London, men har stønad frå ei rekke norske institusjonar når han tar fatt på ein av landets store forfattarar.

H.T.

Sjå på nett no

(NRK) Europeiske val pregar media om dagen. Dokumentarfilmen All makt til folket (2016) er eit godt innblikk i ei av dei populistiske rørslene – den italienske komikaren Beppe Grillos Femsstjernersrørsle. Slagordet «tutti a casa» frå filmens originaltittel peikar på viljen til å sende alle frå den politiske klassen heim. Danske Lise Birk Pedersen har topp tilgang til sentrale aktørar, men Grillo verkar fjern og uføreseieleg. Suksess og splid er nøkkelord. Demokrati på italiensk er eit underhaldande kaos.

H.T.

Tre på topp:

Noko av det James Baldwin sakna i oppveksten, var å kunna identifisera seg som homofil mann når han gjekk på kino. Her er tre som yter minnet hans rettferd:

My Beautiful Launderette (1985) Hanif Kureishis suksessroman vart ein stor filmsuksess trass i lada tema som innvandring og homofili.

Beautiful Thing (1996) Ein av desse rørande filmane der du tenkjer alt går gale for dei to ungdomsgutane, men så er alt heilt greitt i staden. Elsk.

Moonlight (2016) Årets Oscar-vinnar klarte å blanda det tradisjonelle gettobiletet med nyansert og vakker framstilling av skeiv legning i dette miljøet.

B.A.