Filmfjes

Når Oslo Pix startar for fyrste gong, er det med Susann Østigård som konstituert festivalsjef. Østigård har tidlegare vore sjef på Dokumentarfestivalen i Volda og jobba på Film fra Sør i tillegg til å laga dokumentar for både film og radio. Den indiske boksefilmen Light fly, fly high vann ho og regikollega Beathe Hofseth den gjæve IDFA-prisen for i Amsterdam i 2013.

B.A.

Sjå på nett no:

(NRK) Ein av filmane eg såg på BIFF (Bergen Internasjonale Filmfestival) for nokre år sidan, gjorde sterkt inntrykk på meg. Han heitte Outing (2012) og portretterte menn som stod fram som pedofile. Kva gjer ein med dette forferdelege problemet? Klart ein skal straffa når lovbrotet er utført, men er det ikkje viktigare å forhindra at det skjer i fyrste omgang? I Ein pedofil i nabolaget går dei inn på dei same problemstillingane, berre styrkt av ulike forskarar i tillegg til dei som er modige nok til å stå fram med at dei tenner på barn. Det trengst nyansering og mot for å få bukt med pedofili.

B.A.

Tre på topp

Seriar med Elisabeth Moss, ein sterk skodespelar som er i vinden med vaiande feministfane:

1) The Handmaid’s Tale. Serien bygd på Margareth Atwood dystopiske roman frå 1985 skapar eit stilig univers og blandar ei amishliknande sekt med 1984, The Stepford Wives og Children of Men.

2) Top of the Lake. Premieren på andre sesong av Jane Campions krimserie kom i skuggen av David Lynchs retur. Kiwien Campion leverer slåande fotografi frå heimlandet og krass kjønnskritikk.

3) Mad Men. Rolla til Moss som ambisiøs kvinne blant machomenn er kanskje den mest spennande i denne særs populære og stilige serien.

H.T.