Filmfjes

Tenk, norske Mammon 2 vart Emmy-vinnar! Det er mange fjes som kan visast fram, men brørne Gjermund og Vegard Stenberg Eriksen har velfortent pryda framsider i det siste. Dei to er serieskaparane bak vinnaren og såleis dei som mottok TV-verdas svar på Oscar-statuetten denne veka. Prisen vart fyrste gong delt ut i 1949, og den internasjonale varianten har eksistert sidan 1973.

B.A.

Sjå på nett no:

(Netflix) Ingen er visst meir populær i serieverda for tida enn Margaret Atwood. Og det med god grunn. Ikkje før har dønningane etter Handmaid’s Tale lagt seg, så kjem nok ein serie basert på ei av bøkene hennar. Alias Grace er eit finurleg mysterium med undertonar av både overtruisk og overnaturleg art. Ikkje lat deg skremma av at det ser ut som eit klassisk kostymedrama. Det er så mykje meir.

B.A.

Tre på topp

Ikkje berre Pablo Larraín leverer. Andre chilenske filmar frå det siste året:

1) Los Perros av Marcela Said. Drivande spenning og stort skodespel er nøkkelen når Antonia Zegers og Alfredo Castro møtest i eit drama om dei skjulte syndene til den økonomiske eliten.

2) En fantastisk kvinne av Sebastián Lelio. Denne framifrå skildringa av trøbbel for transpersonar kjem på kino til jul. Talentfulle Lelio er tilbake etter at han gav oss gull med Gloria.

3) The Grown-Ups av Maite Alberdi. Denne dokumentarfilmen er ei respektfull, sjarmerande og morosam skildring av livet på ein skule for vaksne med Downs syndrom.

H.T.