Konsert

J.S. Bach:

Kantatar

Collegium Vocale Gent; dir.: Philippe Herreweghe Thomaskirche Leipzig, laurdag 10. juni

Belgiske Philippe Herreweghe, som i 1970 stifta Collegium Vocale Gent, er ein grand old man innan Bach-tolking, med eit utal innspelingar av kyrkjekantatane. I Noreg hugsar somme han som Stavanger Symfoniorkesters sjefdirigent for tidlegmusikk på byrjinga av 2000-talet. Konserten hans i Thomaskyrkja, Bachs arbeidsstad gjennom 27 år, var ei oppleving utanom det vanlege.

Dei fire yndlingskantatane hans frå Bachs fyrste kantateårgang inkluderte òg ein av mine favorittar: Sie werden alle aus Saba kommen (Dei kjem alle frå Saba), BWV 65, eit rikt instrumentert verk som – i tillegg til songsolistar, blandakor og strykarar – krev to horn, to blokkfløyter og to oboar da caccia. Den sistnemnde instrumenttypen (ordrett: «jaktobo») blei oppfunnen i Leipzig i 1720-åra og var ofte brukt av Bach. Den mørke, fyldige obotonen, toppa av skimrande blokkfløyter og staselege støyt frå horna – dette gjev kantaten ein særeigen eksotisk klang. Bach ville her openbert ha noko som høvde til soga han tonesette, nemleg den om «vismennene frå Austerland» som hylla Jesusbarnet.

Thomaskyrkja er enorm. Her står ikkje musikarane i austenden ved altaret, men på orgelgalleriet (oppe, lengst bak). Eg har vore på konsertar i denne kyrkja der framføringa blei klangleg og artikulatorisk diffus. Men Herreweghe var klok nok til å justera ned tempoa og insistera på markant og luftig artikulasjon. Difor klang det alltid klårt. Koret læt fantastisk, orkesteret spelte med optimal presisjon og kvart ord frå solistane var skjøneleg. Kort og godt: Herreweghe gav meg den største konsertopplevinga under årets Bachfest.

Sjur Haga Bringeland