FAMILIEFILM/KOMEDIE

Regi: Paul King

Paddington 2

Med: Hugh Grant, Hugh Bonneville, Sally Hawkins

Paddington frå 2014 var vittig, søt og sjarmerande. Filmen gav meirsmak. No er den folkekjære bjørnen trygt plassert hjå familien Brown i London. Han slit for å tene pengar til ei flott bok om London til tante Lucy, men boka har ein løyndom. Når den sjølviske skodespelarnaboen (Grant) stel boka, er det den hårete venen vår som hamnar i fengsel.

Stjernetolking

Ein heil hurv høgt akta skodespelarar er i sving. Ringrevar som Brendan Gleeson, Julie Waters og Jim Broadbent borgar for kvalitet. At filmen har norske stemmer, så dei minste forstår kva som blir sagt, er av det gode, men det er litt synd ikkje å få høyre stemmene til stjernene. Dubbarane slit med å halde på sjarmen i stemma til folk som Gleeson og Sally Hawkins. Mykje av humoren som slo an i førre film, stør seg på språkleg finesse som ofte forsvinn i omsetjinga.

Lite lått

Bjørnen er bygd på god grafikk og har ein festleg framtoning. Stundom slår slapsticken til. Språkleiken som gav den geniale rulletrappscena i førre film, er det mindre av. Søtlåte drama og halsbrekkande action tar for stor plass. Difor blir Paddington 2 meir ei middels samlebandsoppleving. Filmen minner meir om teiknefilmserien frå seint åttital enn den første varianten for fjernsyn på syttitalet. Diverre når ikkje denne oppfølgjaren opp til standarden frå 2014, korkje i sjarm eller humor.

Håkon Tveit

Håkon Tveit er lektor i latinamerikansk kultur og historie ved Universitetet i Bergen og fast filmmeldar i Dag og Tid.