Elektronisk

Burial:

Tunes 2011–2019

Hyperdub

Den enormt populære, men langt frå populistiske, britiske produsenten Burial gav ut sitt første album i 2006, nummer to i 2008, og sidan då har han gjeve ut ei rekkje EP-ar. Det er desse – med nokre unntak – som er samla på denne framifrå samleskiva.

 Burial lagar regnvåt musikk – her dryp, sprakar og knakar det nærast konstant, «for å skjule det kjipe i låtane», som den audmjuke artisten sjølv sa i eit intervju med kritikaren og filosofen Mark Fisher i 2012. Kanskje det å dynke lydbiletet i samplingar av høljeregn og vinylstøv faktisk hjelper på inntrykket av det lydtekniske, men nettopp mangelen på glattpolering er ein enorm kvalitet i Burials musikk. Han lagar det meste av musikken sin i SoundForge, eit svært enkelt lydredigeringsprogram utan kvantiseringsrutenett og automatisert digital presisjon, noko som gir det heile eit svært organisk og særeige preg – ingen andre lagar trommebeats som gyngar akkurat slik som dette.

 Samleplata er sett saman på interessant vis, i ukronologisk rekkjefølgje, og i nokre tilfelle er spor frå ymse EP-ar stokka om på og vovne saman på nye vis – til dømes tar det tre spor og tjuefem minutt før noko som liknar ein stødig rytme får etablert seg. Låtane til Burial er oftare enn ikkje svært labyrintiske, og denne samleplata legg til eit ekstra nivå av kompleksitet til den alt kjensle- og referansetunge musikken, spekka som han er med samplingar frå dataspel, R&B, Youtube-vedkjenningar og mykje meir.

Rasmus Hungnes

Rasmus Hungnes er musikar og fast musikkmeldar i Dag og Tid.