Jazz

HELGE IBERG’S JAZZ-KAMMER:

A Musical Offering

Elin Rosseland, vokal; Bendik Hofseth, tenor- og sopransaks; vokal, Helge Iberg, piano; Mats Eilertsen, bass; Paolo Vinaccia, trommer. odiN ODINCD9563

Helge Iberg (63) er musikalsk altetande: frå samtidsoperaen Det ondes problem – et sosialdarwinistisk Gesimskunstverk til «Fisking i Valdres» med Viggo Sandvik. Øystein Sunde og Sigmund Groven er to, blant mange artistar, som har brukt Ibergs tenester. Plater i eige namn er det lenger i mellom. Det er grunn til å kryssa av i almanakken for hausten 2017, for det var då Iberg gav ut både kammermusikkplata Life Music og A Musical Offering.

Iberg har late seg inspirera av ei rekkje klassikarar, men det er stort sett ikkje snakk om tradisjonelle tolkingar. Det dukkar opp sitat i ny og ne, elles ligg inspirasjonen og påverknaden på eit anna plan. Unnataket er to komposisjonar Iberg har skrive til tekstar av Erich Fried og dei to Lennon/McCartney-låtane «Here There And Everywhere» og «Blackbird». Sistnemnde er ei lita perle takk vere eit vedunderleg sopransakskor frå Hofseth og ditto basskor frå Eilertsen. At det framleis er verd å lytta til vokalisten Hofseth, syner han på desse låtane, særleg sistnemnde.

Pianostilen til Iberg er minimalistisk med utsøkt sans for harmonisering. I Rainbow Studio med Kongshaug ved spakane er pianolyden garantert stroken. Lydbiletet opnar opp for Eilertsen og Vinaccia i dels frie roller og med mykje boltreplass. Vinaccia fargelegg og kommenterer i kjent stil. I 2009 gav Iberg og Rosseland ut Standards and Vanguards i lag. Rosselands bidrag her avgrensar seg til medverknad på «Eifriger trost», «All The Things You Are»-inspirerte «Alle dinge» og duett med Hofseth på «When A Heavy Drop Falls». Ei elles god plate hadde tolt meir Rosseland.

Lars Mossefinn

Lars Mossefinn er frilans kulturarbeidar og fast jazz-
meldar i Dag og Tid.