Fem studentar starta Café Opera i 1985. Dei laga eit kafétilbod som dei sjølv sakna i byen. 32 år seinare er Café Opera populær både som restaurant og kafé om dagen og som bar om kvelden.

Kafeen ligg ved Den Nasjonale Scene midt i Bergen sentrum, og er omringa av fleire kioskar på kvart gatehjørne.

– Dei har ein tendens til å legge seg opp mot kvarandre, seier Ryland, som er dagleg leiar, og som har jobba på Café Opera i 20 år.

Men trass i dei nye konkurrentane trur ikkje Rydland at stamkundane har forsvunne.

– Ikkje alle etableringar konkurrerer med oss. Mange går nok innom Starbucks for ein kaffi og ein muffin. Men dei går gjerne framleis hit for å ete. Forhåpentlegvis vil ungdommane som går på Starbucks, utvikle ein smak for kaffi, og kome hit når dei er eldre, håper han.

– Korleis var konkurransen i Bergen sentrum for 20 år sidan?

– Før var det gjerne færre kafear i byen, men også fleire gjestar rundt dei som fanst. Det var elles få kioskar å sjå.

I Bergen var det Café Opera som var først ute med kontinentale kaffidrikkar som cappuccino, americano og caffè latte. I Oslo var Kaffebrenneriet ein av dei første kaffikafeane, i 1984. I dag får ein kaffidrikkar overalt, men Ryland fryktar ikkje konkurransen.

– Det er ein vanskeleg bransje, men eg trur ikkje det vil bli som det er i daglegvarebransjen, der det berre er kjeder. Folk tenker kanskje at Starbucks og Espresso House er trygt og attkjenneleg; dei veit kva dei får. Det er kanskje ikkje spennande, men det er godt nok.

Frittståande, lokale kafear kan stundom vere vanskelege å få auge på om ein er turist, men søker ein på nettet, får ein tips om gode kafear. På Café Opera kjem turistane frå og med april månad.

– Det hjelper på at turistbussane kjem køyrande forbi, seier Ryland.