Som den opplyste lesar har fått med seg, har staten gjeve kinesiske TikTok 150 MW av kapasiteten i straumnettet i Innlandet. Dette har i sin tur ført til at våpenprodusenten Nammo på Raufoss ikkje får nok straum til å utvida produksjonslina for artilleriammunisjon – ammunisjon som i sin tur skulle gå til mellom anna regjeringa i Ukraina. Konsernsjefen i Nammo har bede regjeringa velja mellom våpen til Ukraina og kattevideoar.

TikTok er ikkje på langt nær så negativt som det kan høyrest ut som. Dag og Tid – nei, vi kan ikkje gje opp kjelda – har fått tak i eit lydbandopptak frå ein telefonsamtale mellom Vladimir Putin og ein produksjonsansvarleg EDB-tilsette i eit regionalt våpenselskap. Karen Putin snakkar med, heiter Jonasevitsj Gahrstorontovitsj.

Putin: – Gode Jonasevitsj. Det syner seg at vi er åt å gå tomme for langtrekkande stridsvognsgranatar.

– Det var dumt. Er du nøgd med dei vi har produsert for deg?

– Jau, eg er særs nøgd. Eg høyrer berre godt nytt om granatane. Dei når minst 30 meter.

– Det var kjekt å høyra.

– Grunnen til at eg ringjer deg, er at vi treng fleire. Vi treng minst to millionar til. Kan du levera det?

– Vel. Du har sjølv sagt at det er viktig å halda Kina på vår side…

– Ja, det er rett. Xi er ein god mann som har hjelpt oss mykje, særleg ved å krevja rabatt på oljen vi sel til Kina.

– Og du veit også at TikTok er særs populært hjå soldatane vi har ved fronten? Dei legg stadig ut videoar av ukrainske kattar dei har fått tak i, kattar soldatane våre er særs glade i.

– Ja, dei videoane er verkeleg fine. Eg ser stadig på dei.

– No har det seg slik at TikTok har kverrsett all straumen vi før hadde her i regionen.

– Det er berre rimeleg. TikTok må vi ha.

– Ja, men det inneber at vi ikkje kan produsera fleire granatar. Kinesarane har teke all straumen.

– Ja, ja, sånn kan det gå.

– Så kva gjer vi no?

– Slik stoda er no, forstår eg at det berre er éin ting å gjera: Vi trekkjer oss ut av heile Ukraina og lover aldri å invadera dei igjen. Eg skal leggja ut melding om det på TikTok.

JH