Epistel

Walid al-Kubaisi

1. Imamen

Ein son kom frå moskeen til faren og sa:

– Imamen spådde i Koranen for meg og sa at eg snart kjem til å verta martyr i Paradis.

Faren såg på sonen som var vorten ein ung mann, og oppfatta at imamen ville verva sonen som terrorist. Faren fortalde sonen om Stalin:

– Stalin hadde ein sekretær som kom inn på kontoret til han og sa: «Ein mann står ved døra di og påstår at han kan spå framtida di.» Stalin gav ordre om å avretta han, og grunngav det slik: «Dei som påstår at dei kan sjå inn i framtida, får ein lærepenge. Om denne spåmannen kjenner framtida, ville han ikkje ha kome til meg for å døy.»

Faren gav så følgjande råd til sonen:

– Gå til imamen og sei til han: «Far min spådde for deg i Koranen og fann ut at du kjem til å døy som martyr to år før meg. Trur du at spådom i Koranen alltid fungerer?»

Sonen gjorde som faren sa. Imamen forstod poenget og sa:

– Son, det stemmer ikkje alltid.

Då skjøna sonen at spådomar ikkje er Guds openberring, men fantasien til imamen.

2. Dei fem livsballane

Konsernsjefen i eit amerikansk selskap heldt ein tale på 60 sekund der han sa:

– Tenk deg eit spel med fem ballar som hoppar mellom hendene dine medan du prøvar å hindra at nokon av dei fell i golvet. Ein av ballane er av gummi, resten av glas. Dei fem ballane er: arbeid, familie, helse, vener, ånd. Det tar ikkje lang tid før du skjønar at «arbeid» er ein gummiball når han sprett opp att, og at dei andre er laga av glas. Viss éin av dei fell, vert han skadd eller øydelagd. Du må innsjå det og streva for det. Administrer arbeidet ditt effektivt i arbeidstida, men lat ikkje arbeidet slita deg ut. Gå heim att med godt samvit etter arbeid. Gje tid til familie og vener, kvil deg godt og ta vare på helsa di. Viss du misser helsa, er det vanskeleg å få henne attende som før.

Walid al-Kubaisi er forfattar og fast skribent i Dag og Tid.