Håvard Rem:

KVIL I FRED (SÅ LENGE)

Tor Røste Fossen (1940–2017)

Kva tenkte du for tjue år sidan 

då den store praktboka kom

om historia til fotballandslaget

utan eit einaste bilete av deg

som hadde leia det same landslaget

i nær ti år og hundre kampar

Eg vart like forbanna

som eg vart lukkeleg ein septemberkveld i 1981

då du gav meg det største kicket

eg har fått i ein stol

ein halv meter over stolen

då me slo England 

i ein kamp som tydde alt for England

etter at du som fyrste landslagsleiar sidan krigen

tok oss til eit OL som me aldri kom til

av di Sovjet gjekk inn i Afghanistan

Kvil i fred

Kvil i fred så lenge

før me kjem etter deg

alle som vil møtast 

på himmelpuben og prata med deg 

om då me slo England

Me får god tid til den praten

før dei kjem skravlande 

dei som var unge då me slo Brasil

i ein kamp som ikkje tydde noko

for Brasil

Håvard Rem