1. Kappsaga: Det meste av veden i Noreg har blitt til med bruk av handsag og øks. Det var ei stor lette då kappsaga kom til gards tidleg på 70-talet. Ho kom frå Brødrene Sundt på Røros. Hadde ein vett og brukte høyrselsvern, kunne ein nyte musikken frå sagbladet. Knepet var å nytte rette treslaget og å køyre strangane med vekslande fart gjennom bladet. Eg hadde mest lyst til å lyde etter orrhanen oppå åsane.

2. Vedkløyvaren: Ligg no kubben der, må han oftast kløyvast, skal han kome seg gjennom omnsdøra. Med åra svinn manndomskrafta, så øksa duger mindre etter kvart. Men gamle Jutul 802 A frå Vågå duger enno. Eg ser dei unge held seg til vedmaskinen som kappar og kløyver og nesten leier veden inn i omnen i eitt jafs. Sjølv går eg og ventar på roboten.

3. Traktoren: I 8000 timar har vi vore saman, eg og Ford 4000-en. Vi har opplevd store saker i lag. Han kom til i Vest-Tyskland og er snart 43 år no. Han er av det trufaste slaget, sviktar aldri.

Kolbjørn Bjørsnøs