Tjukke solar, tynne solar, under- eller overpronasjon – det er mykje ein må bry hovudet med om ein skal finne dei perfekte joggeskoa.

Men det var faktisk verre før, og med før meiner eg tidleg på 2000-talet. I sportsbutikken kunne du prøve ei tredemølle, ein sakte filmanalyse viste korleis foten din trefte bakken, og seljaren fann fram spesialtilpassa sko. Var nedslag skeivt innover eller utover skulle pronasjonen i skoa rette opp feilen og så vidare. Nå har forskarane gjort enklare funn: Det er den joggeskoen som kjennest best på foten, du skal gå for. Tynne solar utan pronasjon kan altså òg vere greitt.

Medan mosjonistane fokuserer mest på helse og rygg, snakkar verdseliten om fart og tid. Vaporfly-skoa til Eliud Kipchoge er på grensa til for gode. Eit spesielt skummateriale i solen skal gi ein trampolineeffekt og har blitt sett på løparane med dei beste tidene. Før OL i Tokyo skal skoa innehalde visse krav, blant anna skal ikkje solen vere over 40 millimeter, og han må også ha vore i sal på den opne marknaden i fire månadar før konkurranse. Så langt kvalifiserer solane til Kipchoge seg, det same gjer Mette-Marit sine.

Maren Bø

Maren Bø er idrettspedagog og frilansskribent.