Christiane Jordheim Larsen

christiane@dagogtid.no

Joe Biden, den 77 år gamle presidentkandidaten for Det demokratiske partiet i USA, valde denne veka Kamala Harris (55) som partnar fram mot presidentvalet 3. november. Visepresidentkandidat Harris har innvandrarbakgrunn, med indisk mor og jamaicansk far. Ho er utdanna jurist og har mellom anna hatt vervet som justisminister i delstaten California. Ho har vore senator for California sidan 2017.

– I kva grad vil Kamala Harris’ kandidatur som visepresidentkandidat styrkje kandidaturet til presidentkandidat Joe Biden, eventuelt svekkje det?

– Historisk sett har det ikkje så mykje å seie kven som er visepresidentkandidat. Men Harris’ kandidatur er symbolsk og ein historisk inspirasjon for mange. Men desse ville nok ha stemt på Biden uansett, fordi entusiasmen for å stemme mot president Donald Trump er så stor.

– Kva har Harris som Biden manglar?

– Ho er mykje yngre. Det er fleire omsyn som må takast. Joe Biden er den eldste presidentkandidaten i USAs historie, og 78 år er forventa levealder for amerikanske menn. Det er viktig at ho er yngre, og at ho kan ta over om det skjer noko med han. Det er òg viktig i eit mangfaldig land at det ikkje står to kvite menn på røystesetelen.

– Kva vil du seie er styrken hennar?

– Bortsett frå det symbolske – at ho representerer noko som mange ikkje har sett representert før – er styrken hennar at ho er tøff og kan bite frå seg. Det er viktig, for visepresidentkandidaten har tradisjonelt vore vaktbikkja til presidentkandidaten, og den som har teke åtaksposisjonen.

– Kva er dei svake sidene hennar?

– Den mest openberre svake sida er at venstresida i partiet ikkje er så glad i henne. Sånn sett står det to moderate kandidatar på valsetelen. Biden har ikkje hatt som mål å trekkje til seg ytre venstre. Då ville han ha valt ein annan kandidat. Men følgjarane til Bernie Sanders ville neppe vore nøgde med nokon annan enn Sanders uansett.

– Kva vil Harris verte kritisert for av politiske motstandarar i det republikanske partiet?

– Det vert interessant å sjå. Ho vert kritisert frå venstresida for å vere for moderat og frå høgresida for å vere for venstrevridd. Ho har vist at ho kan vere ein ganske flink politisk spelar som veit korleis ho skal posisjonere seg og samarbeide når det må til. Då kan ein bli utsett for kritikk for å vere for fleksibel i standpunkta sine.

– I fjor freista Harris å verte presidentkandidat for det demokratiske partiet, men ho trekte seg. Kva skjedde?

– Ho fekk veldig lite støtte. Det var jo eit felt med svært mange og gode kandidatar. Ho vart nok plassert i same kategori som Biden, den moderate kategorien. Der var det for mange å konkurrere med.

– Harris er senator frå California. Korleis har ho markert seg?

– Ho er den einaste svarte kvinnelege senatoren i det amerikanske senatet. Ho sit i justiskomiteen, der ho har markert seg som ein tøff utspørjar. Særleg under høyringa av Brett Kavanaugh, som vart oppnemnd til høgsterettsdommar, og William Barr, som vart oppnemnd til justisminister. Tidlegare justisminister Jeff Sessions sa at han vart nervøs fordi ho stilte så mange spørsmål.

– Kva for ein posisjon har ho teke i samband med drapet på George Floyd og opptøyane som har kome i etterkant?

– Ho har vore ei markant røyst for dei som protesterer. Ho har stilt seg saman med dei, mot politifolk. Ho vert kritisert for at ho tidlegare, i rolla som aktor, ikkje var på den «rette sida» og var for snill med politiet. Så her har ho ei blanda bakgrunn. Men etter drapet på George Floyd har ho vore med dei som protesterer, og også sjølv delteke i ein demonstrasjon i Washington.

– Før Biden lanserte visepresidentkandidaten sin, vart det i lang tid spekulert om at kandidaten ville vere ei svart kvinne. Kvifor har kjønn og hudfarge vorte så viktig i val av visepresidentkandidat for demokratane?

– Det er merkeleg at ein i eit så mangfaldig land som USA skal ha to kvite menn på valsetelen. Biden sa at han skulle velje ei kvinne. Etter drapet på George Floyd rekna folk med at han ville velje ein kandidat som ikkje var kvit.

– Korleis vil du skildre Harris som type?

– Eit uttrykk som vert brukt om henne, er at ho er «a happy warrior». Ho er glad og sikker, men tøff også. Ein smilande krigar.

– Kva tenkte du då Biden peikte på henne?

– Dei aller fleste hadde trudd at ho ville verte valt. Når du har ein kvit gammal mann i det demokratiske partiet, eit parti som er mykje meir mangfaldig enn det republikanske, gir det mykje meining å ta med ein yngre, mangfaldig kandidat. Vi må tilbake til 2004 for å sjå den siste røystesetelen frå Det demokratiske partiet med berre kvite menn.