Å falle mellom to stolar

Av og til fell ein mellom to stolar. Når ein er student, skal ein overleve på eit lusent studielån, men om ein tener pengar i tillegg, så mistar ein stipendet. Ein er dømd til å vere fattig. Og når ein er ferdig med å studere, er ein overkvalifisert til vanlege jobbar, men har for lite arbeidserfaring til å jobbe med det ein er utdanna til. Og slik har vi det gåande.

Men vi lurer litt på dette:

– Kva er det mellom dei to stolane?

– Kva type stolar er det snakk om? (Er det Egget av Arne Jacobsen eller ein keisam pinnestol?)

Fin eller stygg?

Nokre gonger er vegen frå fin til stygg ganske kort. Og det er ikkje alltid lett å avgjere om ein fell ned på rett side. Da vi arrangerte barnedåp for ein månad sidan, kjøpte sambuaren til Guri inn serviettar. Guri syntest det var fint at han valde Marimekko, men fargane, da? Er kombinasjonen av oransje og rosa superfin eller gyseleg stygg?

Viktige nyheiter:

– Politiet skal ikkje lenger ha lov til å vere morosame på Twitter.

– Rumpetaske er in.

– Småbarnsforeldre kranglar om kven som er dårlegast til å bake og kven som hatar mest å gå på alle sommaravslutningane.

– Ikkje alle telefonar til politiet er like viktige.