Aldri så gale at det ikkje er godt for noko (Guri)

Det er ganske strevsamt å ha ein baby. Men nokre positive bieffektar finst det:

– Når babyen har feber, rekk ein ikkje å eta, noko som fører til at ein (ufrivillig og utan strev) slankar seg.

– Ein vaknar kvar time om natta og fell sjeldan ned i djup søvn, difor drøymer ein svært mange interessante drømmar.

– Eg kom visst ikkje på noko meir.

Enkel kur

Mange prøver febrilsk å spare pengar, medan andre ynskjer å gå ned i vekt. Sigrid har funne løysinga på båe problema: Klipp sund bankkortet ditt.

Kjære idretts- utøvar

Neste gong du vinn ein medalje og skal skryte av deg sjølv, er du da nøydd til å bruke omgrep som «helt sykt» og «sinnsykt»? Kva om du heller seier at det var «friskt», ja, kanskje til og med «100 prosent friskt»?

Lur taktikk (Guri)

I natt drøymde eg at Petter Northug var kjempesint på grunn av ei sak om religionsutøving. Han plasserte seg på den liberale sida, og meinte det var lov å vere religiøs utan altfor strenge oppmøtereglar i kyrkja. Eg prøvde å spionere på han, og følgde etter han i eit varehus med møblar. Eg gøymde meg under eit stuebord, men skjønte at eg var ganske synleg der. Heldigvis hadde eg på meg ein onepiece i eit orientalskmønstra teppeliknande stoff, og håpa difor at eg gjekk i eitt med teppet eg låg på. Om Northug sette seg ved dette bordet for å prate med nokon, tenkte eg, ville eg få med meg svært mykje interessant.

Det er mogleg at eg gjorde alt dette fordi eg trass alt arbeider som innsidejournalist og treng nokre gode saker av og til.