Dagens oppgåve

Omset denne setninga til nynorsk:

Vi ønsker å bytte bøtta.

Svaret finn du nede i høgre hjørne.

Samlivs- opplæring

Så stod vi der igjen, opp mot 2000 barn og vaksne, på årets sommarfest på skulen, og jubla over det faste innslaget «ei overrasking», som inneber at ei popstjerne eller to kjem og opptrer. Så stod vi der, hoftesvingande, 100 sjuåringar, 100 åtteåringar og så vidare oppover, stolte foreldre og besteforeldre, syngande i kor, her fritt omsett frå engelsk: «Når du ligg på golvet og tiggar om meir, kom og spel på tromma mi. La meg smake, å, når eg er klar, er det berre å forsyne seg, fingeren på avtrekkaren, eg legg meg ned og speler med, kroppen min, no greier du ikkje vente, eg er heilt med.»

Ja-ja. Det er vel verken verre eller betre å stå og hoie at «vi tar en pinne for landet» i lag med Freddy Kalas, eller «fy faen, fy, fy faen, mange av gutta mine har begynt å hustle om da’n» i lag med Hkeem og Temur.

Høyrt ein søndag

«Nei, no er det verkeleg på tide med eit par kvite kvardagar. Ingen raudvin resten av veka.»

Svar på dagens oppgåve

Me ynskjer å byta bytta, vi ynskjer å byte bytta, vi ynskjer å byte bøtta, me ynsker å byta bøtta, vi ønskjer å byte bytta, me ønsker å byta bøtta, vi ønsker å byte bytta, me ønskjer å byte bytta, vi ynsker å byta bøtta og så vidare. Eventuelt kan du berre la vere å bytte bøtta.