For kvar gründer som lykkast, finst det mange som mislykkast. For kvar god forretningsidé må det finnast mange dårlege. Nokre gonger er det vanskeleg å føresjå kva som vil bli ein suksess og ikkje. Men éin ting er sikkert: Spørjeundersøkingar er ei gullgruve!

Svar på spørjeundersøkinga

Den førre Innsida vår var utforma som ei spørjeundersøking. Dag og Tid-lesarane er svært engasjerte menneske. «Kom hjem fra Oslo 2. juli og har tenkt på spørsmålene i halve natt», skreiv ein av lesarane til oss. Vi fekk inn tilstrekkeleg med svar til at spørjeundersøkinga vart representativ og sanningsgehalten høg.

Det var stort spenn blant innsendarane våre. Vi har merka oss nokre spesielle karakteristika: 60 prosent har raud som favorittfarge, medan dei resterande 40 prosent hadde blå som favorittfarge. Den mentale alderen går frå 15 år via 75 år og vidare til «utgamal». Blant dei ufullførte utdanningane var det mykje rare greier, mellom anna eit sjudagars offiserskurs, doktorgradssøknad og kurs i å leva i lengevarande forhold. Dei fleste svara at dei var kjekke, medan éin av innsendarane opplyste at han hadde mista håret. Det var ingen riksmålsbrukarar som hadde sendt inn svar.

Her samanfattar vi svara frå dykk som sende inn. Alternativa som har fått flest svar, er fasit.

1. KLIMA OG MILJØ

Spørsmål: Kva bør ein gjera med ein tom druestilk for å bli kvitt han på ein mest mogleg miljøvenleg måte?

Svar: Druestilken kan sendast til ein lokal kunstar og nyttast som materiale i den nyaste installasjonen.

2. SAMFUNN

Spørsmål: Kva bør eigentleg D-en i Victor D. Norman stå for?

Svar: Diskohomo

3. SPORT

Spørsmål: Kva er det mest imponerande trekket ved dialektane til desse norske mannlege herrefotballtrenarane?

Svar: At Drillo konsekvent uttalar sjanse som «kjangs».