Det er festivaltid i matlandet Noreg. Førre veke var det akevittfestival på Gjøvik, snart er det rakfiskfestival på Fagernes og krabbefestivalen i Sandnessjøen var som alltid tidleg i september. Laksefestivalen på Lovund samlar alltid mange. Elles var det rekordoppmøte på Matstreif i Oslo og Smak i Tromsø, der bygatene var fulle av gode lokale råvarer. Innsida deltek med liv og lyst, der ein vert invitert (ofte ikkje attende til same stad).

På Voss er Smalahovesleppet ein 20-årig tradisjonsom òg vert krydra med lokalmatmarkering og ølfestival. Vestlandet kan by på ein imponerande flora av små triveleg bryggeri. I Øystese går kvart år Siderfestival i Hardanger av stabelen. Eit flott tiltak for ei næring som hardingane skal leva av i framtida. Seks produsentar har no statleg løyve, og kvaliteten er minst like bra som i Frankrike eller England. I framtida vil Hardanger kunne vera eit distrikt à la Burgund, Alsace eller Cognac. Siderfestivalen kårar beste amatør og beste profesjonelle sidermakar. I amatørklassen, som i Hardanger naturlegvis fort vert ein semi-profesjonell klasse, var det Joar Aga frå Aga som stakk av med fyrsteprisen. I den svært profesjonelle klassa var det berre sider frå Ulvik i finalen. Kampen stod mellom Nils Lekve og Asbjørn Børsheim. Børsheim frå Ulvik Frukt og Cideri tok fyrsteplassen med Kvitanesen Poesider. For alle som meiner dei har ei god oppskrift, er det berre å førebu seg til siderfestivalen i 2018, om sider omsider til hausten ein gong.