Kinesiske stjernesteikn

I Kina har dei ikkje stjerneteikn, men dyreteikn. Vi lèt dyreteikna fortelja oss kven vi er, og overraskande nok stemmer alt på ein prikk!

Sigrid er okse: Oksen trur på hardt arbeid, truverd, tolmod og viljestyrke. Han er observant når det gjeld å få nye vennar, blid, og arbeider godt med hendene. Når oksen blir sint, blir han valdsam og farleg (Sigrid som barn og ungdom). Oksen vel orda sine med omhug. Med eit minimum av strev kan oksen få suksess (Sigrid på vidaregåande). Lykkefargar: kvit, gul og grøn. Oksen herskar over timane frå 01.00 til 03.00.

Guri er hest: Hesten er fødd som omstreifar og er energisk, attraktiv og intelligent. Han er glad i å gå på festar og festivalar. Hesten er kjend for multitasking og botnlaus energi (akkurat som Guri). Dette gjer han til ein suksessfull journalist, seljar eller instruktør. Han tek sjeldan imot råd frå andre, men handlar på eige initiativ. Hesten forstår seg på pengesaker (som Guri). Lykkefargar: gul og grøn. Hesten herskar over timane frå 11.00 til 13.00.

Braut, som var ein okse, var ein hest. Medan Julius, som er ei ape, er ei geit. Dette verkar noko ulogisk, spør du oss.

Hestar det er verdt å hugse

Travhesten Alm Svarten fekk i si tid tildelt Gran kommunes kulturpris. Han fekk dessutan både sin eigen song og si eiga bok, ein hestografi skriven i «jeg»-form, med John Buer som skuggeforfattar. Ein annan travhest, Atom Vinter, var æresborgar i Gausdal og reid rett inn i samfunnshuset da han fekk tildelt tittelen.

Braut

Det alle litterære menneske lurer på, er om oksen Braut er oppkalla etter Daniel Braut i Bondestudentar. Michael Brøndbo i Nationen har (nesten) svaret: «Braut er etternavnet til bøndene oksen ble født hos. De er fra Jæren, så det er ikke utenkelig at det er en slags kobling, iallfall.»