Innsida har vore sør i Troms i vakre Gratangen, der dei kvart år arrangerer Foldvik Marked og Kystkulturfestival. Dette har dei gjort i snart tretti år. Oppmøtet er særs godt i den travle kystkommunen, som òg huser eit av tre fartøyvernsenter som Riksantikvaren er ansvarleg for. Bygda har liten hotellkapasitet, så folk flest bur i båten eller i vogn og bubil på jorda kring Foldvik brygge. Forutan ei imponerande samling restaurerte båtar kan marknaden by på eit svært breitt tilbod av varer og mat. Innsida var naturlegvis imponert over det breie tilbodet av lefser og bakst. Men det som i kystsamanheng er heilt unikt med Gratangen, er at dei har tre store godt bevarte nottørkarbrygger. Høge flotte konstruksjonar som vitnar om stor fiskeriverksemd her nord. Kystkulturfestivalen vert arrangert neste år òg.

Vasskraft og industri

I Tyssedal ligg Norsk Vasskraft- og Industristadmuseum. Innsida var naturlegvis innom for å få litt påfyll om kva vasskrafta har hatt å seia for velstanden vår. Knapt noko byggverk for 100 år sidan var viktigare og meir påkosta enn industribygga. Her til Tyssedal kom Sam Eyde og sette i gang den norske industrirevolusjonen. Kraftstasjonen vart teikna av arkitektane Thorvald Astrup og Victor Nordan, som henta inspirasjon frå italienske kyrkjer og katedralar. Han ligg der ved Sørfjorden, like vakkert som eit slott ved Como-sjøen, der til dømes George Clooney har sumarhus. Ved kaien, då Innsida var innom, låg direksjonssluppen «MY Tysso», eit lite smykke av ei skute som vart nytta av vasskraftsdirektørane for at dei skulle koma seg til Granvin, der dei kunne ta toget til Voss, vidare til Bergen og så til London, der dei henta pengane til utbygginga.

I dag står denne kraftstasjonen som eit monument over fornybar energi, slik museumsstyrar Knut Markhus så treffande sa det til Innsida.