Norske matskattar del 7: øl

I vår serie, som enno ikkje har fått overført statsstøtte, presenterer Innsida denne gongen øl. Øl er nok ikkje ei norsk oppfinning, men heilt klart ein norsk matskatt. Norsk øl går attende til den fyrste tida folk rydda seg sin eigen gard. I nyare tida vart det bryggeri i alle byar med respekt for seg sjølv, før det på 90-talet vart få og store nasjonale bryggeri. Den gamle gardsbryggartradisjonen overlevde i Stjørdal og på Voss.

I dag har nasjonen meir enn 170 små handverksbryggeri. Det spirer og gror. Å nyta ein lokal norsk øl har vorte meir som franskmenn nyt eit glas vin. Innsida illustrerer teksten i denne spalta, som er fri for statleg støtte, med eit bilete av øl frå Hardanger.

No er det hjort

Av tidl. kokkelærling ved Mælands Hotel i Granvin, Ivar Nimme

I haustmyrkret, tidleg

Fer gutane ut,

Sverre og Ivar og sonen

hans Knut,

Med nista i sekken

på jakt etter hjorten

Eg er ikkje sorten,

Eg vil ikkje skyta,

men gje meg eit lår

og ei nyskura gryta,

då skal du sjå på noko til kar,

væpna til tenna

med sopp, smør og rjome,

varsku i stova,

hjorten har kome!!