Sidan norske verdiar på ein måte var tidas melodi, sende eg ein SMS til den gamle skulekameraten min i Sogn, han Konrad, med spørsmål om kva han rekna som dei ti fremste norske verdiane. Og han drygde ikkje akkurat med svaret:

1. Gå etter vegen i kveldinga og hoie

2. Sitje i kommunestyret og lage eit helvete

3. Terge folk

4. Hoppe på isflak i fylla

5. Hevde at kristendommen er ein fleire tusen år gammal norsk verdi

6. Provosere islamistar

7. Nekte å bli med på fjelltur

8. Springe Holmenkollstafetten utan å ha trena ein time og springe forbi veltrena folk som er tretti år yngre enn deg

9. Skjere igjennom og ta heile middagsrekninga i staden for å diskutere i timevis kven som har ete og drukke kva på ein betre restaurant. (Dette gir deg også ein viss respekt.)

10. Samle på små plastfigurar

Eg lovar ikkje at vi skal komme tilbake til temaet «norske verdiar», men eg lovar heller ikkje det motsette. Takk til deg, Konrad, iallfall, for dette nyttige innspelet. Du er sanneleg knuppen på dassloket.