Ny språkpris

Prisen for haustens beste Dag og Tid-setning blei i går delt ut i dei småærverdige lokala til Avissetningsforbundet, som dessverre ligg i Oslo, ikkje Ølen eller Å. Dei inviterte, det vil seie dei som var innom, song og hoia mens dei delte ut prisen, som var ei pannekake og ei dokke (biletet under) laga av ein lokal kunstnar. Prisvinnaren, Sjur Haga Bringeland, kunne dessverre ikkje stille, då han var opptatt med kunst og musikk i utlandet. I alle fall vann han for setninga «Dei kvikke, velfraserande oboistane snor melodiane sine grasiøst i kvarandre, og dei livfulle, litt gåseaktige støyta frå fagotten skapar drusteleg driv i bassen.»

Dagens oppgåve

Finn språkfeilen – den eine feilen, altså – i denne setninga:

Eit følge av at dagens ungdommar har tjue dashar ketchup på kjøttet sitt, det vil seie ein overdose, er at dei blir skarlaksraude i ansiktet.

Den umoglege nynorsken i diktform

Syt eg eller syter eg?

Skryt eg eller skryter eg?

Eg syter og skryter.

Saut og skraut eg?

Nei, eg sytte og skrytte.

Bryt eg så saman?

Eg bryter saman.

Eg braut saman.

Eg har brote saman.

Rå latter

Svar på dagens oppgåve

Feilen er «eit følge». Det skal vere «ei følge» (eller «følgje» elle «fylgje»). Grammatisk hokjønn, altså.

Hadde du rett svar, kan du ta deg fri resten av dagen.