Som kanskje nokon (men etter kvart færre og færre) vil hugse, gjekk det for ein del tiår sidan ein uhyggeleg høyrespelserie på NRK, «I trifidenes dager», basert på ein roman av John Wyndham. Handlinga blir skissert slik: «Menneskenes fremtid er truet etter at spesielle lysfenomen har blindet store deler av verdens befolkning. Så dukker de uhyggelige trifidene opp – intelligente, vandrende og morderiske planter.» Som dei fleste andre har eg vel trudd at desse plantene var eit slags litterært påfunn, rein science fiction. Men då eg i går gjekk ut på gangen og kikka ut vindauget – kva fekk eg sjå? Jo, ein fryktinngytande gjeng med trifidar som ville inn til meg og truleg ta livet av både meg og den minimale kjernefamilien min. Så inntil vidare må eg halde meg innandørs og sørgje for å halde alle luker skalka. Eg kan berre håpe at når desse intelligente og mordariske plantene innser at dei ikkje kjem nokon veg, så vil dei flytte seg over til naboen. Ja, ein kan alltids håpe.