Den fargerike festivalen til kvalens pris, FestiHval i Skrova, vart arrangert for tredje gong i år. Den vesle øya syd for Svolvær i Lofoten prisar denne skatten frå havet, som me diverre ikkje nyttar oss godt nok av. Øya har knappe to hundre innbyggarar, men når kvalen skal lyftast fram, strøymer folk til i små og store båtar.

I år kom kokkane Gunnar Jensen frå Tromsø, Jonathan Romano frå Oslo og sjølvaste Arne Brimi frå Vågå for å freista kunnskapane sine på den urnorske råvara.

FestiHval er gratis og smaksprøvane er sjenerøse. Kvalskuta Reinebuen gjekk innom Skrova på sin veg for å levera kval til LofotHval i Svolvær.

Det var dessutan denne dagen sumaren kom til den vakre øygruppa.

Kvaliteten på norsk kval har endra seg totalt. I dag er dette ei delikatesse som vert teken godt vare på. Ute i Atlanterhavet her nord lever 100.000 vågekval. Vår kvote er omlag 1300, men sidan det er få som driv med det, klarar me ikkje å nytta meir enn halvparten.

Kokkar og tilreisande fekk i alle høve ein stor sumardag med næringsrik kval og godt vêr.

Tradisjonen med kval vert halden i hevd av Ellingsen Seafood på øya. I gamle dagar var det over 150 arbeidsplassar knytte til kval her, og fangsten av det store sjøpattedyret var viktigare enn sjølve Lofotfisket.