«Laurdag måtte politiet rykke ut til ein bustad etter meldingar om husbråk. Naboar ringde dessutan diverse media, og dermed kom òg journalistane til åstaden, inkludert underteikna, tilsett i Dag og Tids sommarbrudulje. Ifølge ein nabo skreik ei kvinne ’så høgt at eit vinglas knuste på terrassen to hus nedanfor’. ’Jammen godt det var kvitvin i glaset’, la ein journalist frå Verdas Gang til. ’Stolputene var nemleg kvite, og ho som heldt vinglaset, hadde kvit kjole på seg, slik kvinnfolk gjerne har om sommaren.’ På spørsmål om kvinna skar seg, svarte ein annan journalist: ’Det skjer seg aldri for kvinnfolk med kvit kjole og kvitvin innabords.’

Då ingen opna for politiet, tok dei seg inn i bustaden, der dei høyrde roping og det dei antok var fyllebråk frå etasjen over. Bråket viste seg å komme frå ein familie på seks som såg VM-kampen mellom Sverige og England. Det lukta pizza og øl, men ølet inneheldt berre 2,8 prosent alkohol, kunne politiet konstatere. Og ifølge konemora i huset var det særleg åtteåringen og elleveåringen som brølte. ’Dei skiftar fullstendig personlegdom når dei ser fotball, og dei heiar på feil lag, endå dei har brukt veker og månader på å lese seg opp’, opplyste ho.

I det same skåra England, og både gutar og gubbe hylte som om dei var kvinner.

Då politiet bad dei fem andre lukke vindauga, så folk fekk fred, hissa den eldste av ungane seg opp. ’Er du klar over kor heitt det blir her, med alle vindaugsflatene?’ ropte ho. ’Djises!’

Og ja, det var rett nok heitt i huset – langt heitare enn i Sverige og England. Sjølv politibetjentane blei ampre i varmen, særleg då det kom ei skåring til.

’Dette kan vi trygt kalle husbråk’, tvitra politiet like etter hendinga. ’Men det blei stille då kampen var over. Ingen blei arrestert.’

’Det er rart det kan bli så mykje roping av ein så liten flatskjerm’, uttalte ein forbipasserande til Dag og Tids sommarbrudulje. Og ja, TV-en familien hadde i stova, var rett nok så liten at det er rart dei held ut.»