Sanningsord

«Ingenting smaker så godt som det ein et sjølv.»

(Tuss og Troll, 1968)

Relevant spørsmål

– Ja ja, du sit og plukkar deg i nasen?

Advokatnytt

«Advokaten ble arrestert gjentatte ganger med narkotika før han ble suspendert. Han ble også pågrepet for å ha gått rundt naken, ropt og skreket på et nudistbadeplass i Oslo, mens han slo rundt seg med en dildo.» (NRK)

Advokaten min, den noko humørsjuke og lett monomane Joachim Cappelen Damm, vil, saman med den trufaste hunden hans, Anus, gjerne få understreke at det ikkje er han det dreier seg om, då han har fått eit inntrykk av at enkelte der ute trur det. Vel, då får vi la tvilen komme gamle Joachim til gode, og berre tru han på hans ord.

Memento

Når ein kjem ut på takterrassen om føremiddagen, står månen framleis på himmelen, som ei påminning om at ein skal gå og leggje seg når kvelden kjem.

Gamle kjende

Dei hadde fått god oppdragelse og var blitt flinke til å steike fisk.

Sommaren, førebels program

Om sommaren no blir slik eller slik, så går festivalane sin gang, og det er ein festival kvar einaste dag. Det startar i jonsokhelga med Festspela i Heidal, så følgjer som perler på ei snor Einstøingfestivalen i Uskedalen og Attgløymefestivalen i Valle. Og før ein veit ordet av det, er ein innblanda i Papp 18, Pappvinfestivalen i Jølster! Så då kan eg berre ønskje god sommar! Vi møtest att i august, fulle av gode og dårlege sommarminne.