Innsida har ikkje tenkt å laga ein serie om svenske småbyar, men har likevel fått sjansen til å verta litt nærare kjend med denne byen som ligg midt inne i landet i Västra Gotlands län, ikkje så langt frå Göteborg. Svært liten etter norsk målestokk er Skövde heller ikkje. Om lag 50.000 svenskar synest det er triveleg å bu her. I eit elles flatt landskap har dei ein ås, som gjer at det frå tid til anna kan samla seg noko snø i ljosløypa dei har laga seg. Meir skal det ikkje til for å leggja grunnlag for svensk skiidrott. Det er frå denne åsen Marcus Hellner har trena seg god. Difor er ein av turistattraksjonane ein statue av Hellner, som fekk ein motbakke oppkalla etter seg i Holmenkollen i 2011. Det er altså vår ås i Oslo som er tema for statuen i deira eigen Skövde-ås.

Om dette ikkje er nok for å få innsidelesarar til å valfarta til Skövde, kan kanskje ein ilter og sint tiur som held seg i 5 km-sløyfa vera spanande å oppleva på nært hald. Innsida er glad for at tiuren, eller tjäderen, som denne majestetiske skogsfuglen heiter på svensk, heldt seg i ro under vitjinga no nyleg.