Sommarvêret

Sommarvêret har som vanleg vore varierande, og etter nokre veker «hitett og ditett» nord for polarsirkelen, seier eg som ein av sauene eg møtte: «Vi står han vel av i år òg.»

Agurksakutdrag

«Det var tredje dagen på festivalen at kvinna, som helst vil vere anonym, kjende at ho hadde ein klump i den eine skoen. Ho hugsar tydeleg, meiner ho, at ho tok av seg skoa før ho sovna, og ho tok dei ikkje på seg før ho var i stand til å gå og ete frukost og få seg ein øl før første konsert (Blood Command). Ho kjende klumpen godt under fotsolen, men sjekka ikkje før ho hadde gått heile vegen frå festivalcampen til sceneområdet, der ho endeleg tok av seg skoen og såg at klumpen var ein snuspose.

Karmapolitiet etterforskar saka, og håpar å fakke den som tok seg inn i teltet til kvinna og spytta snus i skoen hennar medan ho sov.

’Det var ikkje kjekt, men det kunne vel vore verre’, uttaler kvinna til Dag og Tid.»

dagens oppgåve

Vel èi av oppgåvene, og vinn ein kul kassettspelar:

1) På diverse veggar i Oslo kan ein for tida sjå teksten på biletet under eller teksten «Unnskyld elskede», alltid skriven med same farge og hand. Finn ut kven som har skrive orda, kven dei er skrivne til, korfor, kva tid og i kva tilstand.

2) Gå på Øya-festivalen. (Har du ikkje billett, still deg utanfor og sjå på alle som går inn eller ut.) Finn eit myndig menneske utan tatovering.