Det vil bli mykje mas framover dersom alle skal føle seg representerte av alle reklamane. I den nye reklamen til DNB, til dømes, poserer ein topplaus Kjetil Jansrud i lag med ei mengd søte kvalpar. Han ligg fyrst på ein skinnfell, og seinare i ei hjerteforma seng i lag med dei, han ber ein kvalp i ein beresele (som om kvalpen var ein baby), han gjer armhevingar med ein labradorkvalp, han kosar med kvalpane i armane medan han tenkjer på sparing.

Sigrid kjenner seg ikkje att i denne reklamen, sjølv om Kjetil Jansrud kjem frå Gudbrandsdalen. Og katten til naboen kjenner seg ikkje representert av alle dei søte kvalpane. Guri derimot, kjenner seg att, sidan ho kan relatere til dette med å ha ein søt baby i beresele på magen samtidig som ho tenkjer på sparing.

Da reklamen vart lansert, skreiv Nettavisen at over 362.000 hadde sett han i løpet av eit døgn. Og over halvparten av dei var kvinner. Det er ganske signifikante tal, sidan det er fleire menn enn kvinner i Noreg. (50,38 prosent av folkesetnaden er menn.) Fordi Kjetil Jansrud er halvnaken, ser kvar kvinne i gjennomsnitt 4 sekund lenger på videoen enn ein gjennomsnittleg mann.