Har du følgt med på serien Spioner blant dyra som har gått på NRK? Her møter vi blant anna ein spionrobot som er utkledd som ein kvalp. Robothunden er så livaktiv at han blir venn med nokre villhundar, og kan såleis dokumentere den «emosjonelle dynamikken i villhundane sine liv». Ved å herme etter kroppsspråket til villhundane blir robothunden godteken i flokken.

Nå viser det seg at det òg finst nokre menneskespionar blant oss. Det er kanskje oppsiktsvekkjande, men alt tyder på at stortingspresident Olemic Thommesen er eit slikt robotmenneske. Berre namnet Olemic tydar på at han går med skjulte microfonar. Han er truleg utsend for å kunne dokumentere den kjenslemessige og/eller byråkratiske dynamikken blant dei «ville» politikarane i presidentskapet på Stortinget.

Måtte bryte opp

Braut – superoksen som har fått nesten 300 000 etterkommarar – måtte til slutt levere inn donorkortet for godt. Både Eirik Jenssen-dommen og Emmy-utdelinga måtte vike plass for Braut i Dagsnytt. Det vart erklært unntakstilstand og landesorg da den 14 år gamle avlsoksen vart send til slakteriet.

Dette kom heller ikkje lenge etter at Hamnesjefen i Os vart brutalt teken av dage mot folkets vilje. Difor rippa nok historia om Braut opp sår som ikkje hadde blitt lækja.

Vi synest dei burde sendt Braut til Os som eit slags plaster på såret, så kunne den snille oksen blitt eit lokalsymbol i staden for den valdsdømde svana. Men det er for seint nå, og vi får håpe at dei to dyra møtest på dei evige jaktmarker.

Trillinglykke for nestenslakta ku

Telemarkskua Gulla har omvendt livhistorie som Braut. Gulla mjølka lite, og vart send til slakteriet berre to år gamal. Eit ektepar syntest Gulla var så sjarmerande at dei kjøpte henne for slaktepris, og redda henne frå ein tidleg død. Sidan har ho fått fjorten kalvar – og noko så sjeldan som trillingar. Kanskje Braut er faren?