Livet har blitt mykje vanskelegare for selskap som driv med statistikk, prognosar og analyse. Nå som alle har fått mobiltelefon og ser om nummeret er ukjent, er det nesten ingen som tek telefonen når byråa prøver seg. Men for å hjelpe ein bransje i fall har vi tenkt å donere denne Innsida til ei spørjeundersøking.

Dag og Tid blir distribuert til heile landet, så vi meiner at publikum speglar den norske folkesetnaden. Og dersom fleire enn to sender inn svar, synest vi at undersøkinga er representativ. Svara vil bli presenterte i eit ekstranummer av Innsida, i tillegg til analysar og ekspertkommentarar. Til slutt må vi nemne at Sigrid har initialane SSB, så det bør ikkje koma som eit sjokk at statistikk er eit tema her.

1. KLIMA OG MILJØ

Kva bør ein gjera med ein tom druestilk for å bli kvitt han på ein mest mogleg miljøvenleg måte?

a) Druekvist vert sortert som ved, og kan brennast i omnen.

b) Druekvist går i matavfallet.

c) Druekvist kan sendast til ein lokal kunstar og nyttast som materiale i den nyaste installasjonen.

d) Druekvist går sjølvsagt i den moderne, fermenterte komposten.

2. SAMFUNN

Kva bør eigentleg d-en i Victor D. Norman stå for?

a) Delano

b) Drevland

c) Daniel

d) Danielsen

e) Dwight

f) Andre: _________

3. SPORT

Kva er det mest imponerande trekket ved dialektene til desse norske mannlege herrefotballtrenarane?

a) Åge Hareides sunnmørsk med dansk aksent.

b) Per-Mathias Høgmos gratangdialekt med skarre-r.

c) At Drillo konsekvent uttalar sjanse for «kjangs».