Ein sommardag for hundre år sidan gjekk eg glad og problemfri nedover ei gate iført kortbukse, då ein mann med dress og stresskoffert ropte: «Shave your legs, woman!»

Dette var rett nok i USA, der mange ikkje er riktig kloke, men etter ei spørjeundersøking i dagane som kom, var konklusjonen denne: «Det spørst kor lodden du er, men jo, barber deg.»

Så då begynte eg å barbere leggane. Det er kjedeleg. Ein skjer seg. Å bruke voks er smertefullt. Og ein undrar, som då eg gjekk forbi ein hårfjerningssalong som lokka med «brazilian waxing» på tilbod (599 kroner), her ein dag: Kven er det som har bestemt at kvinner skal ha langt hår på toppen, men ikkje underkroppen? Og mens eg stod framfor tilbodsplakaten, som viste ein modell full av hud, og smatta på dette (under)livsviktige spørsmålet, kom ei eg kjenner ut døra. Ho er såkalla feminist.

– Kva gjorde du der inne? måtte eg spørje.

– Fjerna hår, vel, ein viss plass og nedanfor.

– Korfor det?

– Korfor ikkje?

– Det er unødvendig, sa eg. – Og eit styr.

– Derfor betaler eg for det, sa ho og såg ned på leggane mine, der stubbane kunne likne grastustar på ei bleik, solsvidd fotballbane.

– Men er det ikkje vondt? spurde eg.

– Ein får bedøving.

– Men korfor?

– Hallo, det er VM, kom det. – Du bør få deg ein time sjølv.

Og så hasta ho vidare. Brasil skulle spele mot Mexico.

Sjølv gjekk eg heim og kledde meg ut som indian... urkvinne.

Sjølvhjelpsreglar

Ifølge psykologiprofessor Jordan Petersons bestseljar 12 rules for Life unngår vi kaos i livet viss vi følger 12 enkle reglar, blant anna: «Puss opp heime før du kritiserer verda», «Sei sanninga – eller ikkje lyg», «Ikkje forstyrr ungane når dei står på rullebrett» og «Kos med kattar». I The Times (og førre Dag og Tid-nummer) kallar Niall Ferguson boka til Peterson ei «gamaldags, mandig ‘sjå-for-helvete-til-å-bli-vaksen’-sjølvhjelpsbok».

Dessverre, skriv Ferguson, gir Peterson «ingen gode råd for den vanskelegaste tida i livet: sommarferien». Ferguson gir oss derfor tolv heimelaga reglar, blant anna: «Ikkje puss opp huset; ungane kjem uansett til å ha fest mens du er borte» og «Snakk tydeleg; ikkje bestill tolv øl når du meiner to» og «Ikkje sjå på TV (bortsett frå VM)».

Det Peterson og Ferguson ikkje har skjønt, er at det berre er eitt regelsett som tel: FIFA-reglane. Her er dei tolv viktigaste:

1) Fargen på graset skal vere grøn. 2) Målstolpar og tverrliggarar skal vere kvite. 3) Ballen skal oppfylle følgande krav: vere rund.

4) Ein kamp blir spelt mellom to lag, og kvart lag kan ikkje ha meir enn elleve spelarar. Éin av desse skal vere målvakt. 5) Berre målvakta kan bruke bukser med lange bein. 6) Undertøy til bruk på nedre del av kroppen (...) skal ha same farge som shortsen. 7) Spelarane (...) kan ikkje bere (…) elektronisk utstyr.

8) Ein kamp blir spelt i to omgangar på 45 minutt kvar.

9) Spelarane har rett til ein pause mellom omgangane. 10) Det er lov å ta ein kort drikkepause mellom ekstraomgangane.

11) Eit mål er scora når heile ballen har passert mållinja.

12) Ein spelar har rett til å stå kor han vil på spelebana.

Hugs det, særleg nr. 10, viss du vil unngå kaos i livet i helga.