Kva er det med den guida turen i huset til Elvis Presley som hevar han over kjendisturismens kikkarmentalitet? Svaret på spørsmålet vart gradvist klart etter kvart som eg vandra rundt der, frå rom til rom, ein dag i november. Særleg vart eg ståande lenge å stire inn i det såkalla «TV-rommet» i kjellaren, som Presley fekk innreidd med tre skjermar, slik han hadde høyrt at president Lyndon Johnson ordna seg i Det kvite huset.

Graceland gir gjestane innsikt i eit stykke kulturhistorie, inn i ein levemåte og ei eiga verd som vart meir og meir isolert frå verda som omgav henne. Huset ber i seg forteljinga om Presleys reise frå fattiggut til verdsidol, frå skreddarsydde rom til mor på 50-talet til dekadente rockestjerneløysningar på 70-talet. Porselensapekatten i TV-rommet stirer like vemodig mot oss som han alltid har gjort. Faktisk ser alt ut slik det gjorde. Trass i turisttrengselen kjennest det som å stige rett inn i fortida.

I dag er det 60 år sidan ein 22 år gammal Presley kjøpte Graceland. Huset kosta han vel 100.000 dollar. Det inneheldt då 23 rom, men vart utvida og endra på fram til rockeikonet døydde der i august 1977, for snart 40 år sidan. Seint på sommaren er dei verkeleg store hordane venta.

Øyvind Vågnes