Interessa for tysk må byrja ein stad. I mi personlege historie byrja det med den gode tysklæraren, både på ungdomsskulen og på gymnaset.

Interessa for Tyskland har ikkje minska. Språklege ressurssenter, kampanjar og satsingar på tysk språk, som Tyskland-strategien til regjeringa frå 2015, er stabla på beina. Men det som verkeleg duger, er faste stillingar i tysk ved norske undervisningsinstitusjonar. Her er stoda enno ikkje opplyftande.

«I framtida kan det bli manko på lærere i ungdomsskolen som kan tysk og fransk», heitte det i ei utsegn frå Fremmedspråksentetet ved Høgskolen i Østfold i mai.

Det handlar altså om institusjonane som utdannar gode lærarar. I Noreg finst det berre éin høgskule som tilbyd masterfordjuping i tysk: Høgskolen i Østfold. Det har dukka opp spørsmål om tysk og andre språk skal bli ein del av den nye lærarutdanninga ved andre høgskular. Det har enno ikkje skjedd. Ungdom lèt seg nok heller styre av lidenskaplege lærarar i studieval enn rapportar frå NHO.

Dag og Tid tok kontakt med norske universitet, og spurde kor mange fast tilsette dei har i tysk, og om dei har planar om å opprette nye stillingar i faget. Sendelektorar, doktorgradsstipendiatar og dilikt vert haldne utanfor.

Her er svara vi fekk:

Universitetet i Berge: Fem faste stillingar. Ingen planar om nytilsetjing.

Universitetet i Oslo: Seks faste stillingar. Instituttet som tysk høyrer til, er i gang med ein ny stillingsplan. Det er ikkje avgjort om det resulterer i nye stillingar til tysk.

Universitetet i Trondheim: 5,5 stillingar på seksjon for tysk ved instituttet. Ingen planar om nytilsetjing.

Universitetet i Tromsø har ikkje svara: Tysk stod her i fare for å bli nedlagt, men faget vart med naud og neppe berga. Ifylgje nettstaden deira: To fast tilsette.

Vi minner om at det tidlegare fanst eit eige institutt for tysk ved norske universitet – tysk eller germanistisk institutt. Ved Universitetet i Oslo var det om lag dobbelt så mange tilsette ved tysk i 1990-åra enn det er i dag.