Kart over skrømt og huldrer

Kva det for noko? Institutt for kulturstudium og orientalske språk ved Universitetet i Oslo har laga eit kart for Ghost Busters, eller var det Åndenes makt? Nei, dette er eit kart for alle med interesse for kulturhistorie. Det er tale om eit «segnkart». Det er eit digitalt kart over gamle segner om varulvar, skrømt, draugar og huldrer.

På nettstaden kan du søkje opp segner knytte til heimstaden din. Ei av sogene frå Brønnøysund, som eg søkte på, heiter «Hans Perså og huldre»: Hans Perså vart forfylgt av ei «tråsøken huldergjente», men så lenge han gjekk med kniv, heldt ho avstand. Men ein dag gløymde han kniven. Kva hende då? Svaret finn du på segnkartet.

Shakespeare på nynorsk

Vestmannalaget i Bergen er det eldste mållaget i landet. I januar i år er det 150 år sidan laget vart skipa. Kulturarbeid på målet har vore ei av oppgåvene til vestmennene frå byrjinga av. I 1918 såg ei av fruktene deira dagens lys, Edvard Germanus Johannessen – eller som Edvard Alme, som han kalla seg – gav ut Ein flokk Shakespeare-sonnettor. Også denne boka feirar år. Det markerer laget med eit opptrykk av den vesle boka. Edvard Germanus Johannessen er elles kjend i Bergen for Nordnesparken, som takk vere han vart gjord om til eit friluftsområde. Boka er å få kjøpt hjå Norsk Bokreidingslag.

Internasjonal pris til Morten Strøksnes

Torsdag vann Morten Strøksnes ein britisk litteraturpris for «Havboka», eller «Shark Drunk», som boka heiter på engelsk. Han vann prisen for beste reiseeventyrbok i Edward Stanford Travel Writing Awards. Prisen vert delt ut for å feire reiselitteraturen og for å oppmuntre fleire reisande til å «leggje ned selfiestonga og plukke opp notatbøkene sine», skriv arrangøren på sin eigen nettstad. Prisutdelingsseremonien vart halden i London, men Strøksnes deltok ikkje.

ronny@dagogtid.no