Kinesisk arbeidspoesi

Livet til ein kinesisk arbeidar er ikkje enkelt. Lange arbeidsveker, tolv timar kvar dag oppreist ved samleband og kvile i fulle sovesalar. Men dei har små pausar no og då. Og kva gjer kinesarane då? Dei skriv – som dei alltid har gjort – dikt. No kjem ein antologi kinesisk fabrikkpoesi ut på engelsk: Iron Moon: An Anthology of Chinese Worker Poetry. Poeten Qin Xiaoyu har plukka ut vers skrivne av 31 arbeidarar. Ikkje overraskande vrimlar det av tilvisingar til «skruvar», «rust» og «repeterande arbeid» i dikta.

To dag Solstad- romanar til Italia

Rettane til Dag Solstads kritikarrosa romanar T. Singer og Armand V. Fotnoter til en uutgravd roman vart nyleg selde til Italia. Det italienske forlaget Iperborea har tidlegare gjeve fire av Solstads romanar og satsar no på nye bøker av den norske forfattaren. Solstads bøker er omsette til 30 språk. Dei tre Solstad-romanane som har kome ut på engelsk, er alle vortne nominerte til den prestisjetunge Independent Foreign Fiction Prize.

Poesien tek nye vegar

Oslo Politikammer har som kjent Twitter-konto, og no apar poetane politiet. På Oslo Poesikammer får du daglege oppdateringar frå lyrikkens gateliv. Desse oppdateringane er sjølvsagt av ein snillare art enn dei frå politiet. Denne veka melde dei mellom anna: «Bislett: Russ utsatt for blind Jan Erik Vold. Ingen skader. God stemning. Rimsmed på stedet med glødende engasjemnent.»

ronny@dagogtid.no