Litteratur

RONNY SPAANS

ronny@dagogtid.no

Pablo Neruda (1904–1973) er kjend for dei fleste. Neruda var psevdonymet til den chilenske diktaren, diplomaten og kommunisten Ricardo Eliecer Neftalí Reyes Basualto, som blir rekna for å vera ein av dei mest framståande diktarane i Latin-Amerika på 1900-talet. Neruda mottok fleire prisar, mellom anna Nobelprisen i litteratur i 1971.

Neruda døydde på eit sjukehus i Santiago, medan han vart behandla for prostatakreft. Han døydde tolv dagar etter Augusto Pinochets militærkupp i landet. Det har lenge vore mistanke om at det låg noko meir bak dødsårsaka hans. Neruda hadde fått tilbod frå den meksikanske presidenten om å søkje asyl i Mexico. Nerudas sjåfør fortalde eit meksikansk tidsskrift at Neruda fekk ei sprøyte med gift for å unngå at han flykta, og at han døydde etterpå.

I 2013 vart ei undersøking av liket til diktaren stabla på beina. Vevsprøvar av liket vart sende til sjukehus i fire ulike land. No har mellombels resultat kome. Kreft er utelukka, heiter det, prøvene viser til ein infeksjon, mogelegvis av bakteriar kultiverte på eit laboratorium. Desse bakteriane skal no granskast vidare.

Reaksjonane på undersøkinga sprikjer. Nerudas nevø Rodolfo Reyes meiner diktaren vart forgifta, medan ein annan nevø, Bernardo Reyes, meiner påstanden om drap har som mål å skapa sensasjonar.