Picasso mot masseturisme

Ein hyperrealistisk skulptur av Picasso vert vist på eit galleri i fødebyen til kunstnaren, Málaga i Spania. Det er den kjende spanske skulptøren Eugenio Merino, som er kjend for å lage modellar av avlidne historiske figurar, som har laga kunstverket. Den hyperrealistisk modellen samsvarer med høgda til kunstnaren og har ekte menneskehår på hovudet, ja, liketil i nasen. Merino seier at han med utstillinga, som er forma som ein suvenirbutikk, vil protestere mot masseturismen i Málaga. Picasso hadde sjølv eit merkeleg tilhøve til heimbyen: Han forlét byen då han var ti år og kom aldri attende.

Inga sak mot Stephen Fry

Den kjende britiske skodespelaren Stephen Fry har vore under etterforsking for blasfemi. Det byrja med eit intervju i programmet The Meaning of Life i 2015 som den irske fjernsynskanalen RTE sende. I intervjuet får Fry spørsmål om kva han vil seia til Gud om han råkar på han når han døyr. Fry, som er kjend som ateist og som opptrer på det populærvitskapelege BBC-programmet QI, la ingenting mellom. Fyrst reagerer han på spørsmålet, så kjem det: «Guden som skapte dette universet, om det vart skapt av ein Gud, er openbert ein galning, ein komplett galning, fullstendig egoistisk.»

Klippet er òg vorte vist på YouTube, der det har hatt over sju millionar visningar. Ein ire som såg klippet, reagerte på utsegna og saksøkte Fry. Det var lenge usikkert om det ville verte sak, fordi denne mannen sjølv ikkje var part i saka. Han meiner sjølv at han gjorde si medborgarplikt ved å melde Fry til politiet. Politiet tok likevel søksmålet alvorleg. Men no, etter to år, har politiet kome til ny konklusjon: Dei droppar saka.

Rekord på Twitter

Ein tenåring har sett ein twitterrekord som no hamnar i Guinness’ rekordbok: 16 år gamle Carter Wilkerson sende ei twittermelding til hurtigmatkjeda Wendys, der han bad Wendys om gratis mat. Meldinga er vorten delt 3,4 millionar gonger sidan byrjinga av april. Dermed er meldinga hans den mest delte på tenesta nokosinne, heiter det hjå Guinness’ rekordbok.

Nynorskpris til journalistar

Kulturdepartementets nynorskpris for journalistar går i år til Guri Kulås og Jens Kihl i Klassekampen. Dei deler ein pris på 50.000 kroner. Prisen blir overrekt fredag 30. juni under Dei nynorske festspela i Ørsta. Føremålet med denne prisen er å fremje bruk av nynorsk i media, og årleg ære ein dyktig journalist som brukar ein levande og god nynorsk.

ronny@dagogtid.no