YouTube-offensiv mot sjikane

YouTube rustar opp for å gjere det vanskelegare å publisere innhald som er krenkande, villeiande eller manipulerande, eller som skadar andre på nettstaden. I løpet av 2018 er målet å auke talet medarbeidarar som jobbar med å fjerne krenkande innhald og hatefulle ytringar på YouTube til 10.000 personar. Det skriv administrerande direktør Susan Wojcicki i YouTube i ein bloggpost nyleg. Ho stadfestar at YouTube – i tillegg til å vere ein plattform for kreativitet, læring og informasjonstilgang, og verte brukt til å fremje sosial endring, mobilisere protestar og dokumentere krigsbrotsverk – også har ei meir urovekkjande side: Dårlege aktørar «utnyttar openheita vår til å villeie, manipulere, trakassere eller skade andre». Dei siste åra har YouTube gjennomført ein offensiv for å fjerne valdeleg eller ekstremistisk innhald på nettsidene, ved hjelp av ny maskinteknologi, algoritmar og medarbeidarar. Berre sidan juni har YouTube fjerna over 150.000 videoar med valdeleg ekstremistisk innhald, ifølgje Wojcicki. No skal lærdomane herifrå brukast til å takle anna problematisk innhald.

Nye historiske vandreruter

Riksantikvaren og Turistforeningen samarbeider om å gjere gamle ferdselsårer i Noreg meir kjende, og lanserer i 2018 fire nye historiske vandreruter. Dei fire rutene er ei stølsvandring i Valdres, Gamle Hadelandsvei gjennom Nordmarka, Reisaleden i Nord-Troms og ei historisk DNT-rute i Jotunheimen, ifølgje Riksantikvaren. Målet med prosjektet er å gje dei gamle ferdselsårene nytt liv som attraktive turruter og syne fram ulike delar av norsk historie, som seterkultur, handelsvegar, fangstruter og den tidlegaste turistferdselen i fjellet. Frå før er det lansert sju andre historiske vandreruter i 2015 og 2016. Dei sju er Brudleruta mellom Sirdal og Kvinesdal, Finnskogrunden i Hedmark, Turistvegen over Folgefonna, Kamperhamrane i Sogn og Fjordane, Jacobinerruta ved Oslofjorden, Flyktningeruta frå Oslo til Sverige og Telegrafruta i Nordland.

leonardo Da Vinci-mysterium løyst

Det handlar ikkje om boka til Dan Brown, men om ein anonym kjøpar av det dyraste målarstykket i verda. For ein månad sidan blei det einaste Leonardo Da Vinci-målarstykket i private hender selt på auksjon hos Christie’s. Summen «Salvator Mundi» nådde, var 450,5 millionar dollar (3,8 milliardar norske kroner). Sidan har journalistar kappast om å finne ut kven som var kjøparen. No har dei lukkast. Han heiter Bader bin Abdullah bin Mohammed bin Farhan al-Saud, og er saudisk prins. Biletet skal synast fram på det nye Louvre-museet i Dei sameinte arabiske emirata.

eva@dagogtid.no