Hanne Lauvstad, leksikograf og etymologiansvarleg i NAOB-redaksjonen, har svara Dag og Tid. Ho fortel at redaksjonen har gått igjennom punkta i artikkelen. Når det gjeld forma «eg», handsamar dei henne likt med «e» og «æ»:

– Frå eit bokmålsperspektiv ser vi på dei som dialektale former. Det kan ikkje vera oppgåva til ei bokmålsordbok å gjera greie for kva for tilvisingsord som er normerte nynorskformer.

Lauvstad vektlegg samtidig at redaksjonen ikkje utan vidare vil føre «jeg» attende til eit dansk opphav:

– Lydutviklinga kan godt ha skjedd i austnorsk, det har Didrik Arup Seip argumentert for. Men når vi skriv «jf. dansk jeg», er det nettopp for å vise til ein mogeleg dansk påverknad.

Når det gjeld «verden», er omsetjinga «menneskealder» av det norrøne ordet ein leivning frå Norsk Riksmålsordbok. Denne detaljen er no retta opp, fortel Lauvstad.

– Men om den vidare omtolkinga av ordet har skjedd i dansk eller norsk, går vi ikkje inn på, for vi meiner det høyrer meir heime i etymologiske spesialordbøker enn i ei allmennordbok som NAOB, og etymologien for «verden» er allereie lang.

Endringar

Lauvstad fortel òg at dei har endra forklåringa for «velge»:

– Vi er samde i at det er ein mangel i velge-etymologien. Som ein vil sjå av etymologiane for «velge» og liknande ord, legg vi vinn på å vise kva som er lån frå dansk i bokmål og kva som er dei norrøne motstykka, til dømes har vi dette oppslaget ved «selge»: «fra dansk sælge, tilsvarer norrønt selja».

Til sist seier Lauvstad at NOAB har teke høgd for at inkonsekvensar kan førekome. Det har med storleiken på prosjektet å gjera:

– Ordbøker av ein slik type, som inneheld millionar einskildopplysningar, har vorte redigert av mange i ein lang periode og av mange personar. Inkonsekvensar i slike prosjekt er ikkje til å unngå, anten det gjeld Oxford English Dictionary eller heimlege ordbøker. Ambisjonen vår har vore at alle enkeltartiklar skal vera korrekte. Skulle ein handheva eit strengt konsekvenskrav i eit så stort prosjekt, ville det ha teke altfor lang tid å gjennomføre. Ordboka blir stendig forbetra. Sidan NAOB er ein digital publikasjon, tek vi òg i framtida gjerne mot tips til endringar.