Skogsbygningar er freda

Statsskog har vore skog- og utmarksforvaltaren til den norske staten gjennom 150 år. Det er nettopp markert med ei stor gjerning hjå Riksantikvaren: I oktober vart 45 bygningar i Statsskogs eige freda: Skogskoier, skogvaktarbustader, funksjonærhusvære og fjellgardar står på lista over freda skogsbygg, skriv Riksantikvaren i ei pressemelding. Fredinga omfattar eitt eller fleire byggverk på 20 eigendomar – 45 bygningar i alt.

Anlegga som blir freda, ligg i ti ulike kommunar, frå Sirdal i sørvest via innlandets skog- og fjelltrakter, med eit tyngdepunkt i Femundsmarka, til Rana, Saltdal og Målselv i nord. Husa er frå slutten av 1700-åra til 1955, om lag halvparten frå fyrste halvdelen av 1900-talet. Fleirtalet av bygningane i denne statlege sektoren er små og unelege, og dei har vorte lita endra sidan dei vart reiste av trauste, sterke skogsfolk.

Ny utstilling om Michael Jackson

National Portrait Gallery i London skal opne ei ny, stor utstilling om Michael Jackson der målet er å syne kva han hadde å seia for samtidskunsten. Eit av mange døme er skulpturen «Bubbles» som står utstilt på Astrup Fearnley Museet. Utstillinga On the Wall som ifølgje museet er den fyrste i sitt slag, kjem til å syne bilete både frå offentlege og private samlingar i heile verda. Utstillinga opnar sommaren 2018, som er det året Jackson kunne blitt 60 år.

Fyrste transperson i Playboy

Forretningsmannen som grunnlag Playboy, Hugh Hefner, døydde for om lag ein månad sidan. Han hadde eit siste ynske før han gjekk bort: at etterfylgjarane hans skulle vise ein transperson på framsida av det amerikanske bladet. Hefner hadde alt peika ut kven som skulle bli den heldige: 26-årige Française Ines Rau. Modellen er fødd i Paris, men er av nordafrikansk opphav. Fyrstkomande månad blir «hen» den fyrste transpersonen som pryder framsida av det erotiske tidsskriftet som i år har eksistert i 64 år.

Modellen seier sjølv at ho vonar at oppslaget vil gje sjølvtillit til andre transpersonar, for venleiken til alle kvinner – trans eller ikkje – fortener å bli feira.

Narrestreken

Ei utlysing av ei stilling som fyrsteamanuensis i nordisk ved Universitetet i Bergen har skapt rabalder i den gamle hansabyen. Og temaet er noko så banalt som ein skråstrek. I utlysingsteksten heiter det at der er ynskjeleg at søkjarane har «forskingskompetanse i nordisk sosiolingvistikk/dialektologi». Komiteen som leia tilsetjingsprosessen, tolka skråstreken slik: kompetanse i sosiolingvistikk er eit ufråvikeleg krav, medan kompetanse i dialektologi kjem på andreplass. Dermed vart mange namn strokne i søkjarbunken. Men ein søkjar klaga, og dermed byrja ballen å rulle. Det har vore oppslag på oppslag i universitetsavisa, og saka kom opp i fakultetstyret. Konklusjonen er klar: skråstrek tyder ikkje rangering av det eine over det andre, men likestilling av begge desse faga. No er det sett opp ny sakkunnig komité som skal vurdere alle søkjarane på nytt.

ronny@dagogtid.no